தத்து நடை நடந்துவந்து....

தத்து நடை நடந்து வந்து

தாவித்தாவி தூக்கச் சொல்லும்

திக்கித் திக்கி பேசுகின்ற

தின்ன அடம் செய்யுகின்ற

முத்து முத்துப் பல்லைக் காட்டி

முத்தம் தந்து மடியில் அமர்ந்து

முப்பொழுதும் அருகில் வந்தும்

முத்தமழை விரும்பித் தந்தும்

பட்டுப் போன்ற மேனியுடன்

பாட்டுப்பாடிக் கதைகள் கேட்கும்

பாட்டன் பாட்டி எப்பொழுதும்

பக்கத்திலே இருக்கச் சொல்லும்

பஞ்சுபோன்ற மெத்தை யாக்கி

படுத்துறங்கி நெஞ்சின் மேலே

பகலும் இரவும் எப்பொழுதும்

பக்கத்திலே நெருங்கி வந்து

தொட்டுத் தொட்டுப் பேசிதினம்

தொந்தரவு செய்கின்ற

மொட்டு போன்ற மழலைகளுக்கு

நித்தம் கதை சொல்லுங்களேன்

 (கவியாழி)