சீக்கிரம் எழுந்து விடுவாள்.........

ஏக்கம் மனதில் வளர்த்தே
எப்போதும் நம்மைக் காத்து
தூக்கம் கெட்டும் நமக்காய் -வாழ்வைத்
தொலைக்கும்  உத்தமி அவளே

ஆத்திரம் மனதில் வந்தால்
அதையும்  உள்ளுள் வைத்தே
அன்புடன் அடக்கி இருந்தே-நம்மை
ஆசைக் கோபமாய்க் கடிவாள்

சாத்திரம் அனைத்தும் படித்து
சரியெனப் பட்டதை மட்டுமே
சீக்கிரம் விளக்கிச் சொல்லி-கதையாய்
சிறந்திடப் புரிந்திட வைப்பாள்

மிச்சம் மீதியைத்  தின்று
மேனியைக் கெடுத்தும் நமக்காய்
உச்சி முகந்தே அருகில்-தொட்டு
உண்மை மகிழ்ச்சியைத் தருவாள்

சீக்கிரம் எழுந்து விடுவாள்
சேவைகள் பலதும் செய்வாள்
சிந்தனை நமக்காய்ச் சுமந்து-மனதால்
சிரித்தே சமைத்துத் தருவாள்

சீருடன் உடம்பை மதியாள்
சீக்கிரம் தூங்க மாட்டாள்
பாத்திரம் அனைத்தும் கழுவி-இறுதியில்
படுத்து உறங்கச் செல்வாள்



அவள்தான் பெற்ற அன்னை.....