போரின்றி ஈழம் கிடைக்காதோ

ஒற்றுமையாய் தமிழர்கள் இருப்பாரோ
ஓரணியில் சேர்ந்து உழைப்பாரோ
போரின்றி ஈழம் கிடைக்காதோ-ஐநா
புகுந்து வாக்கெடுப்பு நிகழ்த்தாதோ

பார்போற்ற மகிழ்ச்சித் திரும்பாதோ
பைந்தமிழன் வாழ்வும் சிறக்காதோ
பூவுலகில் தமிழன் புகழ் இருக்க-புதிய
விஞ்ஞான நிகழ்வும் நடக்காதோ

விஜய வருடத்தில் விடிவும்
விடுதலைக்கான தூய தெளிவும்
வீதியெல்லாம் கோலம் போட்டு-தமிழன்
வீடெல்லாம் மகிழ்ச்சி பொங்காதோ

அயல்நாட்டில் வாழும் அனைவரும்
அப்பா அம்மா கூட்டுக்குடும்பமாய்
எப்போ ஒன்றாய் மகிழ்ந்து-இன்பம்
தப்பா வாழ்வு மீண்டும் கிடைக்குமா

சிண்டு சிறுசும் ஓடியாடி விளையாடி
கெண்டு கிழங்கள் பேசி மகிழ்ந்து
திண்டு திண்ணை சுற்றம் கூடி-இன்பம்
கண்டு மகிழும் நாளும் வாராதோ