Tuesday, 16 December 2014

தூக்கி செல்ல நால்வர்........

உடலும் கழிவாய் மாறும்
உயிரும் பிரிந்து போனால்
உணர்ந்தே நாளும் வாழ்ந்தால்
உண்மை வாழ்க்கை  புரியும்

தூக்கி செல்ல நால்வர்
துவண்டே அழவும் சிலபேர்
தொடர்ந்தே வந்திட உற்றார்
தொலைத்த குடும்ப உறவோர்

வாழ்ந்த வாழ்க்கை  போற்றி
வாழ்த்தும் நண்பர் கூட்டம்
வணங்கிச் செல்லும் மக்கள்
வருந்தி அழைத்தால் வருமா

ஆக்கம் செய்த பணிகள்
அனைத்தும் முன்னே வருமாம்
அன்பால் செய்த செயலே
அருகில் நின்று அழுமாம்

ஏக்கம் இல்லா வாழ்வும்
ஏழ்மை உணரா உயர்வும்
என்றும் நன்மை செய்யா
எவரும் நம்மை மதியார்

தூக்கம் விழித்துப் பார்க்கத்
தோழமை வேண்டும் உலகில்
தொடர்ந்தே குழிவரை வருவோர்
துயரம் கண்டிட வேண்டும்

உயிரும்  உள்ள போதே
உரிமை  கொண்டோர் மகிழ
உணர்வை மதித்துச் செய்தால்
உடலும் மனமும் அழுமே

எல்லா உயிரும் இதுபோல்
ஏந்தல் செய்வது மில்லை
பொல்லா மனித இனமே
புரிந்தால் வாழ்க்கை நலமே


---------கவியாழி----------



Saturday, 13 December 2014

இன்றும் வாழும் பாரதியே....


இன்றும் வாழும் பாரதியே
எப்படி மறப்பேன் உனையே !
எழுச்சித் தமிழை உணர்த்தி-அன்று
எல்லோர் மனதிலும் இடம் பிடித்தாய்!
உன்னை விட்டு வைத்தால்
உலகையே மாற்று வாயென,
பெண்மை யொத்த சிலரால்-மனதால்
பெரும்பிணி யேற்றும் வாழ்ந்தாய்
கண்ணைபோல் வளர்த்த மகளை
கலப்புத் திருமணம் செய்து
கடவுள் இதையும் ஏற்பாரென-விரும்பி
கண்குளிர பார்க்க எண்ணியதை,
திண்ணைத் தோறும் சென்று
தீராப்பழி சுமத்தி வந்தோர்
பெண்ணை மயக்கிப் பிரித்தே-நீயின்றி
திருமணம் செய்து வைத்தார்
கண்ணை இழந்துக் கலங்கிக்
கடின வாழ்க்கை வாழ்ந்தும்
காளையெனச் சுற்றித் திரிந்ததை-சூழ்சியால்
கண்துயில வைத்து விட்டனரே!
(கவியாழி) 

Thursday, 11 December 2014

பிடிவாதம் மனநோயா? ஊனமா?

          பிடிவாதம் என்பது தவறோ சரியோ ஆனால் இது எல்லா வயதினரையும்  விட்டு வைப்பதில்லை. எப்போதாவது அல்லது எப்பவுமே பிடிவாதத்தையே  இயல்பாக கொண்டவர்கள் நிறையப்பேர் உள்ளனர். தான் சொல்வதுதான் சரி என்று வாதிட்டு அவர்களே தம்மைத்தாமே சரி என்று சுயநிர்ணயம் செய்து பிடிதளராமல் தான் நினைத்ததையே செய்வார்கள்.

         குழந்தைப்பருவத்தில் இருக்கும் பிடிவாதம் நாளாவட்டத்தில் எடுத்துச் சொன்னால் சரியாகிவிடும், போகப்போக தனது குணத்தை மாற்றிக் கொண்டு விடுவார்கள். ஆனால் சில குழந்தைகள் எப்போதும் அன்பாகப் பேசிப்பேசியே காரியத்தைச் சாதித்துக்கொள்ளும். அப்படிப் பிடிவாதமாய் இருக்கும் பிள்ளைகள் அப்பா அம்மா சண்டையிட்டுக் கொண்டால் இது நம்மால் வந்த பிரச்சனையோ என்று அஞ்சி பின்பு சரியாகி விடுவார்கள்.

          பத்திலிருந்து பதினைந்து வயதிற்குள் மாறி விடுவார்கள். இவ்வயதையும் தாண்டிய குழந்தைகள் அப்படியேதான் இருப்பார்கள். அதைப் பிறவிக்குணம் அப்பா,அம்மா மாதிரி  என்று பெற்றோரும் சமாதானமாகி விடுவார்கள். ஆனால் அது சரியல்ல. ஐந்தில் வளையாதது ஐம்பதில் வளையாது என்ற பழமொழிக்கேற்ப மாற்ற முயற்சித்தால் நிச்சயம் மாறி விடுவார்கள். நாம் எதிர்மறையான எண்ணங்களை அதாவது நீதான் எங்களுக்கு எல்லா வழியிலும் உதவியாக இருக்க வேண்டும், உன்னைவிட்டால் எங்களுக்கு யார் இருக்கிறார்கள் என்பதுபோல் சொன்னால் மாறும் வாய்ப்பு உண்டு.

          என்னதான் சமாதானம், அறிவுரை சொன்னாலும் திருந்தாத  பிள்ளைகளை நிச்சயம் நல்ல மனநல மருத்துவரிடம் சென்று பார்த்து அவரின் ஆலோசனை பெறுவது மிகவும் அவசியம். இவ்வாறாக அறிவுறுத்துவது நல்லதெனவே எனக்குத் தோன்றுகிறது. ஆம் மாறும் வாய்ப்பு இருந்தால் மனமாற்றம் நல்லதுதானே. படிப்பிலும் நன்கு கவனம் செலுத்த உதவியாய் இருக்கும்.  அவர்களது வாழ்க்கைத்தரமும் மேம்படும்.

           இளமைக்காலத்தில் ஏற்படும் பிடிவாதம்  யாராவது ஒருவர் சொன்னால் நிச்சயம் மாறிவிடும். குறிப்பாக அப்பா அம்மா சொல்வதைவிட, தாத்தா பாட்டி சொன்னால் யோசிக்கும் வாய்ப்பு அதிகம். ஆசிரியரோ பெற்றோரோ சொல்வதைக் காட்டிலும் தாத்தா பாட்டியிடம் நிச்சயம் அன்பாய் இருப்பார்கள். அவர்கள் சொல்வதை மறுக்காமல் கேட்பார்கள். இன்றைய தினம் நாம் நமது பெற்றோரை நெருங்காமல், அவர்களிடம்  அன்பைச்  செலுத்தாமல், அவர்களது அறிவுரையை மதிக்காமல்,  நிம்மதியை இழந்து வாழ்ந்து வருகிறோம்.

          கூட்டுக்குடும்பத்தில்  பிடிவாதம் கொண்டோர் நிச்சயம் இருக்க மாட்டார்கள். காரணம் ஒற்றுமையும், உரிமையும், புரிதலும் இருக்கும். இணைந்து பேசி முடிவெடுக்கும் இயல்பு கூட்டுக்குடும்பத்தில் நிச்சயம் இருக்கும். அதனால் இன்னார் சொன்னால் இவர் கேட்பார் என்பதை அறிந்து அவரிடம் சொல்லிச்  சமாதானப்படுத்தி விடுவார்கள். எனவே கூட்டுக் குடும்பத்தை நாம் தொலைத்ததனால் நம்மை நாமே தனிமைப்படுத்திகொண்டு,  நமது சந்ததியினரும் அதன் அருமையை அறியாவண்ணம் இருக்கிறோம் என்பதை வேதனையாகவே  பதிவு செய்கிறேன்.

          கணவன் மனைவி பிடிவாதம் தவிர்க்க வேண்டியது. ஆரம்ப நாட்களில்  அதுவாகவே சரியாகிவிடும். ஆம், இருவருக்குமான நெருக்கம் மற்றும் தேவைகளினால் சரியாகிவிடும். இப்போதெல்லாம் இருவரின் வருமானம் தேவையென எல்லோருமே எண்ணுவதால் காலப்போக்கில் இருவருமே சமாதானமாகி விடுகிறார்கள். பணத்திற்காகவோ அல்லது  பிள்ளைகளின் நலனை முன்னிட்டோ சமாதானமாகி விடுகிறார்கள்.

         நடுத்தர  வயதில் ஏற்படும் பிடிவாதம் மனமுறிவையே ஏற்படுத்துகிறது. அதனால் வீணான சந்தேகம், அலட்சியம், கோபம் ஏற்பட்டு  விரக்தியில் ஆண்கள் குடிக்க ஆரம்பித்து விடுகிறார்கள்.  பெண்கள் தவறான எண்ணத்துடன் பிரிவு என்னும் வழிக்குச்  சென்று விடுகிறார்கள். இது சரியான வழி அல்ல. எல்லாப்  பிரச்சினைக்கும் தீர்வு சொல்ல விஞ்ஞான காலத்தில் வழியுண்டு.

         இப்போதெல்லாம் வயதான காலத்தில் பேரன், பேத்திகளைக் கவனிக்க மட்டுமே  அப்பா அம்மாவை அருகில் வைத்துக் கொள்ளும் பழக்கம் உள்ளது.  அல்லது முறைவைத்து  உதவியை வலுக்கட்டாயமாகப் பெறுகிறார்கள். கூர்ந்து கவனித்தால் தேவையைக் கருதியே அருகில் வைத்துக் கொள்கிறார்கள். இந்த வயதில்தான் தன் பேரப்பிள்ளைகளின் நலன் கருதிப் பல பெரியோர்கள் பிடிவாதம் தளர்ந்து ஒத்துழைக்கிறார்கள்.

          பிடிவாதம் செய்வோரை இப்போதெல்லாம் விடுதிக்கு தள்ளிவிடும் அபாயமும் உள்ளது. மாணவர்களும் முதியோரும் இவ்வாறன தங்கும் விடுதிக்குச் செல்லவேண்டிய நிர்ப்பந்த நிலைக்கே உள்ளார்கள். ஆனால் இளையோரும் முதியோரும் சேர்ந்த கூட்டுக் குடும்பத்தில தனிமை விடுதிக்கு வேலையில்லை. அன்பும் அரவணைப்பும் இருப்பதால் அவசியம் இல்லாமல் போய்விடுகிறது.

        தீர்க்க முடிந்த பிடிவாதம் நல்வாழ்க்கையைத் தரும், தீராத பிடிவாதம் நல்வாழ்க்கையைத் தொலைத்துவிடும். பிடிவாதம் ஊனமல்ல, ஒருவகை மனநோயே.  எனவே மாணவர்களுக்கும் சரி மற்றவர்களுக்கும் சரி,  முறையான மருத்துவ ரீதியான தீர்வே சரியானதாக இருக்கும். சரியான நேரத்தில் முறையான அறிவுரைகளைக் கேட்டு மருத்துவர்களின் ஆலோசனையின்படி தீர்வுகண்டு,  ஒருமுறை வாழும் வாழ்கையை முறையாகவும்  சரியாகவும் வாழ்ந்து இன்பாய் மகிழ்வோம்.
 

 (மறுப்பதிவு)


---------கவியாழி---------

Monday, 8 December 2014

சொல்வீரே... நல்லோரே...

இல்லா நிலையில் உள்ளோர்க்கு-இயைந்து
இருப்பதைக் கொடுக்கச் சொல்வீரே

பொல்லா வார்த்தையைச் சொல்லாமல் -புரிந்து
புகழை மட்டும் சொல்வீரே

நல்லோர் வாழ்த்த நாளும்- நகைந்தே
நட்புடன் வாழச் சொல்வீரே

எல்லா நாட்களும் நல்லதென்றே -உணர்ந்து
எதையும் மகிழ்ந்தே சொல்வீரே

தினமும் நல்ல வார்த்தைகளைத் -தொடர்ந்து
தெரிந்தே வாழ்த்தச் சொல்வீரே


(கவியாழி)


Sunday, 30 November 2014

புயல் மழைக் காலங்களில்....

புயல் மழைக் காலங்களில் எங்கும்
புறப்பட்டுச் சென்றாலே மூக்குச்சளி
அழையாத நண்பனாக உறவாடும்
ஆறுநாள் தொடந்தே இருக்கும்

அடிக்கடித் தும்மலும் அடங்காது
அழும்படி செய்து விடும்
தலைவலி மிகுந்து வேலை செய்ய
தடையாக இருந்தே தொல்லையாக்கும்

கயல்விழிக் காது தொண்டை
கரகரவென்றே இருந்தும் வலிக்கும்
அயல்நாட்டு மருந்து தின்றும்
அடங்காமல் தொடர்ந்து வரும்

ஐங்கடுகு சூரணதைக் குடித்து
அடிக்கடி மிளகு ரசம் பருகி
துளசி தூதுவளை செடியின்
தூய இலைதனை மென்றாலும்

வயல் நண்டு  ரசம் தொடர்ந்து
வாரம் இருமுறை குடித்தால்
வரும் துன்பம் நீங்கித் தீரும்
வழக்கமான வேலைகள் தொடரும்

(கவியாழி)

Friday, 28 November 2014

அரசுபள்ளிப் ஆசிரியர்கள்,மாணவர்கள் -அன்றும் இன்றும்

கிராமப்புற மற்றும் நகர்புற மாணவர்களின் கல்வி மேம்பாட்டுக்கு ஆரம்ப பள்ளிகளின் ஆசிரியர்களே முக்கிய பங்காற்றினார்கள் என்றால் மிகையாகாது.குறைந்த எண்ணிக்கையில் ஆசிரியர்கள் இருந்தாலும் மாணவர்கள் பள்ளிக்கு வருவதை ஊக்கப் படுத்தும் விதமாக சொந்த பணத்தில் மாணவர்களுடைய கல்விக் கட்டணத்தை செலுத்தியும் ஆசிரியர்களே அருகிலுள்ள கிராமத்திற்கு சென்று மாணவர்களை அழைத்துப் பாடம் சொல்லித்தந்தார்கள்.

பெற்றோர்களையும் சந்தித்து கல்வியறிவின் தேவையையும் படித்தால் பிற்காலத்தில் அறிவு மேம்பாடு ,வாழ்க்கைத்தரம் உயர்வு அரசு வேலை போன்ற அறிவுரைகளைச் சொல்லி மாணவர்களை பள்ளிக்கு அனுப்ப வற்புறுத்துவார்கள்.மாணவர்களை படிக்க வைக்க வேண்டி அரசு வழங்கும் மதியஉணவுத் திட்டத்தில் ஏழை மானவர்களைச்  சேர்த்து மதிய உணவு தந்து படிக்க வைத்தார்கள்.மாணவர்களின் குறைநிறைகளை பெற்றோர்களுக்குத் தெரியப் படுத்தி மாணவர்களின் கல்விக்குப் பேருதவி  செய்தார்கள்

நானும் அரசுப் பள்ளியில்தான் எட்டாம் வகுப்புவரைப் படித்தேன்.நான் ஆரம்பக் கல்வி படிக்கும்போது மாணவர்கள் மேல் அக்கறையுள்ள பல ஆசிரியர்கள் தாங்களாகவே மாணவர்களை அழைத்துவர கிராமத்திற்குள் செல்வார்கள் கையில் தடியுடன் நாலைந்து மாணவர்களை தெருவுக்குத் தெரு தப்பிவிடாமல் (நானும் மாணவர்களைப் பிடிக்க போனது  )வீட்டுக்கே சென்று அழைத்து வந்தது இன்றும் நினைவிருக்கிறது.மாணவர்களின் குடுமப்த்திற்கு பொருளாதார உதவி செய்து மானவர்கழ்ப் படிக்கச் வைத்த ஆசிரியர்கள் பலருண்டு.

அன்றைய நாட்களில் பள்ளி செல்ல அதிகமான அரசு  பேருந்து வசதி கிடையாது .பள்ளி செல்ல ஆர்வம் உள்ளவர்கள் நடந்தோ மிதிவண்டியிலோ அல்லது மாட்டுவண்டி மற்றும் குதிரை வண்டி போன்றவற்றில்தான் செல்லவேண்டி இருந்தது .நடந்தே சிலபல மைல்கள் சென்று படித்து வந்தவர்கள் இன்று நல்ல வேலையில் இருக்கிறார்கள்.நகர்ப்புறங்களிலும் தொடர்வண்டி செல்லும் பாதையிலும் மட்டுமே குறைந்த எண்ணிக்கையில் தொடர்வண்டி வசதி இருந்தது.காலையில் புறப்பட்டு இரவில் வீடு திரும்பியதாய் பலபேர் சொல்லியதைக் கேள்விபட்டிருக்கிறேன்.

அன்றைய நாட்களில் மாணவர்கள் ஆறாம் வகுப்புக்கு மேல் படிக்காவிட்டால் அடிக்கச் சொல்லி பெற்றோர்களே ஆசிரியரிடம் சொல்வார்கள்.வீட்டுப்பாடம் எழுதாதவர்கள் சரியாக பாடம் படிக்காதவர்களை வகுப்புக்குள் முட்டிபோட்டு உட்காருவது ,வெய்யிலில் முட்டிப்போட்டு இருப்பது,வெய்யிலில் நாள் முழுக்க நிற்பது அல்லது அதிகபட்சத் தண்டனையாகத் தலையில் ஒருவர் மாறி ஒருவர் குட்டு வைப்பது  கைவிரல்களை நீட்டி அடிகோலால் அல்லது பிரம்பால் அடிப்பது மற்றும் அதிகபட்சமாக பெற்றோரை அழைத்துவரச் சொல்வது போன்ற சீர்திருத்தும் தண்டனைகள்  இருக்கும்.

இன்றைய நிலையோ எல்லோருமே அறிந்ததுதான் ,அரசுஆரம்பப் பள்ளியில் படிக்க  வைக்க ஆர்வமில்லாத பல பெற்றோர்கள் தனியார் பள்ளியில் சேர்த்து விடுவதன் விளைவு இன்று நிறைய ஆசிரியர்கள் இருந்தும் அரசுப்பள்ளியில் படிக்க மாணவர்கள்  இல்லாது மூடும் நிலைக்கு வந்துவிட்டது.மேலும் ஆசிரியர்கள் மாணவர்களை அடிக்கவோ அதட்டவோ  கூடாது என்ற கடுஞ்சட்டத்தால் ஆசிரியர்களும் மாணவர்களை அரசுபள்ளிக்கு கொண்டுவருவதில் சிக்கல் இருக்கிறது.ஆனால் இன்றும் கிராமபுறங்களில் செயல்படும் அரசு ஆரம்பப் பள்ளிகளில் படிக்கும் மாணவர்கள்  தனியார் நடத்தும் பள்ளிகளைவிட நல்ல மதிப்பெண்களை பெற்று சிறந்து விளங்குகிறார்கள்.

(கவியாழி)

Tuesday, 25 November 2014

இறைவா எங்கே நீ இருக்கின்றாய்

இறைவா !எங்கே நீ இருக்கின்றாய்
இதையும் பார்த்தும் சிரிக்கின்றாய்
மறையோர் புலவர் இருந்தாலும்
மனதைக் கெடுத்தே பாடுகின்றார்

பலபேர் அறியா மொழியாலே
பக்தி பாடலெனப் பாடுகிறார்
சிலபேர் தமிழில் பாட வந்தால்
சினமே கொண்டே தள்ளுகிறார்

தட்டில் விழுகின்ற காசைப் பார்த்து
தருவார் பூவும்  குங்குமம் திருநீறுமே
பொட்டில் அறைந்தது போல் பேசியுமே
புறமே சற்றே தள்ளிச் சாடுகின்றார்

மனமே வருந்தி வருவோரை தினம்
மனதில் உன்னையே  நினைப்போரை
கனமே அருகில் பார்க்க விடாமல்
கடிந்தே உடனே துரத்து கின்றார்

இருந்தால் இதையும் பார்த்துக் கொண்டு
எப்படி அங்கே நீ  வாழுகின்றாய்
தப்புகள் உனக்கும் தெரியலையா
தண்டனை  யாருக்கும் புரியலையா?

(கவியாழி)



Sunday, 23 November 2014

36வது வயதிலும் அப்பாவிடம் அடிவாங்கினேன்.....






எனக்கு அப்போது 36 வயது , நான் சென்னையில் எனது (United India Insurance)காப்பீட்டு நிறுவனத்தில் கிளை மேலாளராகப் பணிபுரிந்து மனைவி மகளுடன் சென்னையில் தனியாக வசித்து வந்தேன். நான் அப்பா அம்மாவை பார்க்க நினைத்தாலும்  அடிக்கடி எனது சொந்த ஊரான சேலத்திற்குச் செல்வதில்லை .ஊரில் எனது இரண்டு சகோதர்களும் நான்கு சகோதரிகளும் 32 பேரன் பேத்திகளும் மற்றும் எல்லா உறவினர்களும் வசித்து வருகிறார்கள் இருந்தும் என்னையே வரவழைப்பார்.

நான் அவரை நேரில் சென்று பார்க்க வேண்டி அவராகவே பொய்யான காரணத்தைச் சொல்லி உடல்நிலை சரியில்லை,மனநிலை சரியில்லை என்று சாப்பிடாமல் இருந்து என்னை வரவழைப்பது வழக்கம்.நானும் நேரில் சென்ற உடன் எழுந்து என்னுடன் மகிழ்ச்சியாகப் பேசிக்கொண்டிருப்பார் அதைப் பார்க்கும் எனது அண்ணனும் தம்பியும் செல்லமான பொறாமையுடன் ,நீயே சென்னைக்கு அழைத்துச் செல் என்று சொல்வார்கள். அப்பா என்னைப் பார்த்து சிரித்து நான் அங்கெல்லாம் வரமாட்டேன் என்பார்.

இதே கார்த்திகை மாதத்தில் அப்போது அவருக்கு வயது 83 இருக்கும் நல்ல ஆரோக்கியமாகவும் இருந்தார்.அப்போது சிறிய அளவில் கால்வீக்கம் மற்றும் கால்வலி வந்து நடக்க முடியாமல் அவதிபடுவதாகவும் மருத்துவரிடம் வராமல் தைலம் மட்டுமே தடவிக்கொண்டு வீட்டிலேயே இருந்தார்.நான் நேரில் சென்றால் மகிழ்ச்சியடைவார் என்று எனது அண்ணன் தம்பி மற்றும் அக்கா அடிக்கடி தொலைபேசியில் சொன்னார்கள் .

எனக்குத் தெரியும் அவர் என்னைப் பார்க்க வேண்டி நடத்தும் நாடகம் என்று,.அதனால் நான்  அதிக விலையுள்ள கைத்தடி ஒன்றை வாங்கிகொண்டு பார்க்கச் சென்றேன். அவர் என்னைப் பார்த்ததும் அன்பாக "ஏப்பா "என்னாச்சு நல்லாதானே நடக்கிறாய் பின்னே ஏன் கைதடியை கையில் வைத்திருக்கிறாய் என்று ஓடி வந்தார்.நான் இந்தாங்க இது உங்களுக்குத்தான் என்றேன் .

அதைக் கொடுத்ததும் அவர் முகத்தில் மாற்றம் தெரிந்தது "எனெக்கென்ன அப்படி வயதா ஆகிவிட்டது இந்தா இதை நீயே வைத்துக்கொள் என்று சொல்லிக்கொண்டே அந்தத் தடியாலே என்னை அடித்தார்.நான் அந்த அடியை மகிழ்ச்சியாய் வாங்கினேன். இன்றும் அதை நினைத்தால் அவரது பிடிவாதம் தன்னம்பிக்கை,மனஉறுதி என்னை மெய்சிலிர்க்க வைக்கிறது.

குடும்பத்தில் உள்ள யார் சொன்னாலும் கேட்கமாட்டார்.நான் நேரில்வந்து விளக்கமாகப் பொறுமையாக் நான் மற்றவர்களைத் திட்டிவிட்டு அப்புறமாய் வெளியில் நண்பர்களைப் பார்க்க சென்றுவிட்டு திரும்பி வந்தால்.அவராக வந்து ஏனப்பா அவர்களைத் திட்டினாய் என் மீதும் தவறு இருக்கிறதே உனக்குத்தான் தெரியுமே என்னுடைய வேலையெல்லாம் என்பார்.

நான் சென்னைத் திரும்பக் கோவை தொடர்வண்டியில் ஏறினால் அன்று நடந்த அன்பான நாடகமான நிகழ்வுகள் என்னைத் துரத்திக்கொண்டே வரும்.
இருந்தும் நான் அவர் பிடிவாதததிலும் நேர்மையான் உண்மையான் பாசத்தை உணர்ந்தேன்.இன்றும் எனது தந்தையைப் போலவே பிடிவாதக்கார அப்பாக்களை நேரிலும் பார்கிறேன்..இதை அவர்களின் பிடிவாதம் என்று நினைக்காமல் அப்பாக்களின் அன்பின் வெளிப்பாடு என்றும்  எல்லோரும் ஒன்றிணைத்து வாழவேண்டுமென ஆசைப்படுகிறார்கள் என்றே என்னால் உணர முடிகிறது.

என்ன செய்வது ,இப்போது அம்மா அப்பா இருவருமே அருகில் இல்லையே என்ற வருத்தம் மேலோங்கி இப்போதெல்லாம் நான் சேலம் செல்வதையே விரும்புவதில்லை.ஏனென்றால் நான் தொடர்வண்டி ஏறினாலே எனது பெற்றோரின் குறிப்பாக எனது அப்பாவின் நினைவுகளே என்னை வாட்டுகிறது..உண்மையில் நான் இன்றும் உணர்கிறேன் அவரின் கோபம் நியாயமானதென்று ஆனால் ?



(கவியாழி)

Friday, 21 November 2014

மூத்தப் பதிவருடன் கவிஞர்.நா.முத்துநிலவன்


 நா,முத்துநிலவன் அவர்களின் சென்னை சந்திப்பு




18.11.2014அன்று கவிஞர் .நா.முத்துநிலவன் அவர்கள் சென்னை வருவதாகவும் .அவர் வரும்முன் நான் புலவர்.ராமானுசம் ,கவிஞர் .மதுமதி ஆகியோரைப் பார்க்க விரும்புவதாகவும் அவர்களுக்கு தகவல் சொல்லிவிடுங்கள் என்றும் சொல்லியிருந்தார்.நான் அவரை மாம்பலம் தொடர்வண்டி நிலையத்தில் இறங்கி விடுமாறும் அங்கிருந்து உங்களை அழைத்துச் செல்கிறேன் என்றேன்


மாலை ஆறு மணிக்கு சொன்னபடியே நான் காத்திருந்து  அவரை நான் மாம்பலம்  தொடர்வண்டி நிலையத்திலிருந்து புலவர் அய்யா வீட்டுக்கு அழைத்துச் சென்றேன்.பின் கவிஞர்.மதுமதியும் உடன் சேர்ந்து கொண்டார்.அப்போது எங்களது கடந்த கால பதிவர் சந்திப்புகள் பற்றியும் நடைமுறை சிக்கல்கள் என்ன ?  நீங்கள் ஏன் வரவில்லை ?உங்களை அங்கு சந்திக்காதது எங்களுக்கு ஏமாற்றமாய் இருந்தது என்று சொல்லி . வருத்தப்பட்டார்.

பதிவர் சந்திப்பில் பார்க்க முடியாததால் நேரில் வந்து விசாரித்ததுடன் மூத்தப் பதிவர்.புலவர் அய்யா அவர்களை நேரில் கண்டு நலம் விசாரித்ததுடன் அடுத்த பதிவர் சந்திப்புக்கு ஆலோசனைகளையும் கேட்டு இன்னும் வரும்காலத்தில் எப்படி சிறப்பாக நடத்தலாம் என்று ஆலோசனை கேட்டறிந்தார்.பின்னர் அவர் எழுதிய "புதிய மரபுகள்"என்ற புத்தகத்தை மூவருக்கும்பரிசளித்தார்.

இவ்வளவு எளிமையான இனிமையான கவிஞரை சந்தித்தது எங்களுக்கு மகிழ்ச்சியாக இருந்தது

(கவியாழி)


Wednesday, 19 November 2014

சிறைபிடிக்கும் மழலைகளே....

மெல்ல மெல்ல தாவிவந்து 
மேனியோடு  சேர்ந்த ணைத்து
எல்லையில்லாக் குறும்பு செய்யும்
எனதருமைக் குழந்தைகளே

வண்ண மயில் போலவும்
வயதையொத்துப் பாடவும்
சின்னதாகக் கதையைச்  சொல்லி
சிரித்து விளை யாடவும்

எண்ணமெல்லாம் ஓரிடத்தில்
எளிதில் நம்மை வசப்படுத்தி
சின்னக் சின்னக் குறும்புகளில்
சிறைபிடிக்கும் மழலைகளே

பள்ளி செல்லும்போது மட்டும்
பார்வையாலே சிறைபிடித்து
எல்லையினைத் தாண்டிச் சென்று
ஏன்அழுது செல்லுகிறாய்

கண்ணெதிரே வளர்ந்துநீ
கல்வியிலும் சிறந்திடவே
புன்னைகையைத் தந்துவிட்டு
புகழுடனே நன்கு படிப்பாய்

(கவியாழி)






Monday, 17 November 2014

கட்டிளங் காளையரும்.....

கொட்டி மழைப் பொழிகிறதே கொட்டோ வென்றே
 குடையெல்லாம் பறக்கிறதே அய்யோ வென்றே
தட்டிவீடும் நனைகிறதே சொட்டுசொட் டென்று-ஏழைக்கு
 தங்குமிடம் கிடைக்கவில்லை  எங்கும் சென்றே

பட்டித் தொட்டி கழனியெல்லாம் வெள்ளமாக
பயிரெல்லாம் அழுகுவதால் உள்ளம் ஏனோ
கட்டவிழ்ந்த  நிலையில் மனதைக் கண்டு-விவசாயி
கண்ணீரில் நீந்துகிறான் கனத்த மழையால்

கட்டிளங் காளையரும்  நொந்து போக
காடுமேடு இருப்பதுபோல் சாலை யெங்கும்
திட்டுத்திட்டாய் இருக்கிறதே எல்லா திசையும்-வேலைக்குத்
திட்டிக்கொண்டே செல்லுகிறார் சாலையிலே

விட்டுவிட்டு மழைப் பெய்வதாலே பெண்கள்
வீட்டில் இருந்தால் எல்லோருக்குமே கும்மாளமாம்
கெட்டிக்கார கணவன் மார்கள் மகிழ்ச்சியாக-இன்று
கேட்டதெல்லாம் வாங்கித்தருவார் மகிழ்ச்சியாக

(கவியாழிகண்ணதாசன்)




Friday, 14 November 2014

அய்யா.ஆ.சிவலிங்கனார்.மறைவு-வாழ்த்துப்பா!

அய்யா.ஆ.சிவலிங்கனார் அவர்களுக்கு அஞ்சலி




           10.07.2014 அன்று அய்யாவுடன் புலவர் குட்டியாண்டி (எ)திருநாவளவன்,
.  புலவர்.இராமனுசம்,புலவர்.கி,த.பச்சியப்பன் மற்றும் அவரின் இரு மகன்களுடன் நானும்.



தங்கமான எங்களாசான்

                                                              **************

தங்கமான எங்களாசான் தமிழை மட்டும்
    ஊட்டவில்லை, இளமையில் நாங்கள் செய்த
கொங்குதமிழ்க் குறும்புகளோ கொஞ்சமல்ல;
    கோதில்லாப் படிப்புக்கும் பங்க மின்றி
மங்கையர் உடன்பயிலும் வகுப்பில் நீங்கள்
   மாத்தமிழைக் கற்றலோன்றே குறியாய் நிற்பீர்
சங்கடங்கள் வந்துவிடும் சார்ந்த கல்வி
   நின்றுவிடும் எண்ணியதைப் பாரீர் என்பார்;

பொங்குதமிழ் உணர்ச்சிக்குப் பொறுப்பு மாவார்
   புரியவைக்கும் ஆற்றலிலும் பொறுமை காப்பார்
தங்குதடை இல்லாமல் தமிழில் பாட்டுத்
   தந்திடுவார் மேற்கோள்கள் பலவும் காட்டி;
சங்கநூல்கள் சதுராடும் இவரின் வாயில்
    சாந்துணையும் தமிழ்படிக்கத் தூண்டும் சொற்கள்
நுங்கினைப்போல் உண்டுண்டு மகிழ்ந்த நாளை
    நும்மிடத்தில் எடுத்துரைக்கக் காலம் போதா!

இப்படியே நான்காண்டும் இவரிடத்தில்
    கற்றகாலம் இன்றுவை என்றன் நெஞ்சில்
அப்படியே நிற்கிறதே என்ன சொல்வேன் !
    அன்றொருநாள்  நாவுக்க(ரசர்) நாடகத்தில்
அப்பூதி வேடத்தில் நடிக்கச் சொன்னார்;
    அழகுத்தமிழ் உரையாடல்; சொக்கி நானும்
தப்பேதும் இல்லாமல் தனியே சென்று
    தந்தபாடம் மா.நெல்லித் தோப்புக்குள்ளே

ஒத்திகைகள் பலபார்தேன் உடனி ருந்த
   உயிர்த்தோழர் நற்றமிழும் நடிப்புங் கண்டார்
இத்திரையில் உனக்கீடு சிவாசி என்றார்;
    இதற்குமேலே என்ன வேண்டும் ஏற?
புத்துணர்ச்சி தந்தார் என் நண்ப ரெல்லாம்
    பொதுவுடமைக் கி.த.ப. சிரிப்பி லார்த்தார்
எத்தனையோ இடர்ப்பாடி தற்குப் பின்னே
   என்னடிப்பில் குறைக்கானாப் புலவர் .வேதா

இரட்டணைரா மாநுசன்,கண்ணப்பன் போன்றோர்
    எண்ணியதம் திராவிடத்தின் கொள்கை தன்னைத்
தரமுயன்றார் நாடகத்தில் என்றன் வாயால்;
    தமிழ்பயிற்றும் மயிலமிதைத் தாங்கா தென்றேன்,
உரமுடன்நான் நாவலர்போல் உரைக்க வில்லை
    ஒண்டமிழில் நாவுக்க ரசரே ! என்றேன்
நரிகளெனைக் கழட்டிவிடப் பார்த்த போது
    நயமாக இவரிடத்தில் உண்மை சொன்னேன்.

நல்லதப்பா! நமக்கீது தீமை சேர்க்கும்
    நாடகத்தில் அந்தவாடை நடவா வண்ணம்
சொல்லுதலே நன்றென்று நயமாய்ச் சொல்லி
   நாவுக்கரசர் என்றழைக்கச் சான்று தந்தார்
நல்லதமிழ் விளையாட்டு நடந்த தன்று;
   நாடகத்தில் நற்சான்றும் பரிசும் பெற்றேன்.
வல்லதமிழ் நாடகக் கண்ணார்.அ.கு.முக
   வேலன்போன் றோரென்னை வாழ்த்துச் செய்தார்

ஆசி,பெற்றேன் அன்பு பெற்றேன்அன்று மின்றும்
   ஆழ்ந்தபல நூலிலும் கற்றேன் பல்லோர் போற்ற;
நா.சிவலிங்கமென்னுமோர் சொல்லை நாளும்
    நவிலுதற்கு நம்முருகன் அருள் பொழிந்தான்
பாசிறக்கும் நற்றமிழில் பாட வைத்த
    பண்புநிறை இறைவிழியே! நன்றி ! நன்றி!
மாசிலுயர் தமிழை  யென் மனத்தில் ஏற்றி 
    மாவலனின் தாள்போற்றி வணங்கு கின்றேன்.

            நன்றி;"தேன்தமிழ்ப் பாமலர்கள் என்ற நூலிலிருந்து

 (பாடலை எழுதியவர்; புதுவை எழில்நிலவன் (எ) புலவர்.சீனு.ராமச்சந்திரன்)


(கவியாழி கண்ணதாசன்)


Monday, 10 November 2014

அய்யா புதுவை எழில் நிலவன் (புலவர்.சீனு.ராமச்சந்திரன்




அய்யா புதுவை எழில்நிலவன் (எ) சீனு.ராமச்சந்திரன்
********

புதுவை தந்த பாரதிபோல் 
புரட்சிப் பாரதி தாசனைப்போல் 
இவரும் தமிழைப் படித்தறிந்து-தவறாய் 
இமியின் அளவும் வாராமல் 
அகவை எழுபது வயதிலுமே 
அனைவரும் மெச்சும் வல்லவராய் 
அங்குமிங்கும் எவ்விடமும்-தமிழை 
அழியா வண்ணம் காத்திடவே 

சிலம்புச் செல்வர் அடிதொற்றி 
சிறந்தே தமிழை மெருகூட்டி 
தினமும் தமிழே உயிர்மூச்சாய்-எல்லா 
திசையும் சென்று பாடுகிறார் 
கவிதைக் கதைகள் நாடகமே 
காவியம் சொல்லும் நடிகராக 
இளமைக் காலம் முதற்கொண்டு-தமிழை 
இன்றும் விரும்பிக் காதலித்தும் 

பலரைப் போற்றிப் பாவடித்தே
பழைய நினைவை மறக்காமல் 
புத்தகம் வடிவாய் உருவேற்றி-நல்ல 
புதிய சரித்திரம் படைத்துவிட்டார் 
இளைஞர் பலரும் விளையாட 
இவரோ விரும்பியது தமிழைத்தான் 
இன்றும் அன்றுபோல் இளைஞராக 
இனிதே தமிழை  உயிர்மூச்சாய் 

கடுகின் அளவும் குறைவின்றி 
கருத்துப் பிழைகள் நிகழாமல் 
விருத்தம் ஓசை சந்தத்துடன்-கவியை 
விரைந்தே மகிழ்ந்துப் பாடுகிறார் 
அய்யா இன்றும் ஏக்கமுடன் 
அழியாத் தமிழை விருப்பமுடன் 
அனைத்துப் புதிய படைப்புகளை-தினமும் 
ஆழ்ந்தே படித்து வருகின்றார் 

தமிழேத் தினமும் உயிர்மூச்சாய் 
தினமும் புதிதாய் படித்தறிந்து 
அனைவரும் உணர வானொலியில்-இன்றும் 
அழகாய் பாடி தொடருவதால் 
சான்றோர் நல்லோர் அறிஞர்களும் 
சான்றாய் தந்த பட்டங்களும் 
நீண்டே செல்லும் தொடராக-மலைப்பாய் 
நினைத்தே மகிழ்ந்தேன் உளமாற.

(கவியாழி கண்ணதாசன்)

Thursday, 30 October 2014

சுற்றமும் நட்பும் உறவாய்.....

விதவை மணம் மறுத்து
வீதியிலே செல்லும்போது
கதைகள் பல சொலலி
காயப் படுத்வோர் பலராம்

உறவும் அறுந்து  வாழ்க்கை
உணர்வும் மடிந்து சிலரோ
துறவம் இருந்து வந்தால்
துன்பம் அங்கே மிகுமாம்

வாழ்வும் இன்பம் தொலைத்தார்
வறுமை கொண்டே வாழ்வோர்
ஊரும் உறவும் பிரிந்து
உலகம் பலதும் சென்றும்

காணும் மக்கள் எங்கும்
கன்னித் தமிழைப் போற்றி
நாளும் இருந்து வருவோர்
நாவில் இதுபோல் வேண்டாம்

சுற்றமும் நட்பும் உறவாய்
சேர்ந்து வாழ்ந்து வருவீர்
குற்றம் குறைகள் மறந்து
குலமே தமிழாய் வாழ்வீர்


(கவியாழி)



Tuesday, 28 October 2014

மூத்தப் பதிவர்.புலவர்.இராமானுசம்





(அய்யா புலவர் இராமானுசம்)



வயதில் மூத்த பதிவர்
வளமைக் கொண்டகவிஞர்
இளமை பருவம் முன்பிருந்தே
இனிமைத் தமிழைப் படித்தறிந்தே

தெளிந்த நடையில் கவிபடைக்கும்
தேர்ந்த கவிதைப் புலவராவார்
வலையில் வருவார் போவோரை
வயதைப் பார்த்துப் பேசாமல்

உறவாய் வலையைப் போற்றியே
உடனே படித்துப் பார்த்துமே
புரிந்தால் மட்டும் கருத்துகளை
பதியத் தயங்கிட மாட்டார்

உதவி என்று கேட்போரை
உடனே அழைத்துப் பேசிடுவார்
நிலைமை நன்கே புரிந்தவுடன்
நிறைய உதவிகள் செய்திடுவார்

துணையை இழந்தும் மறவாமல்
தினமும் எண்ணிக் கலங்கிடுவார்
மகளைப் பெற்ற தாயாக
மகிழ்ந்தும் இன்றும் வாழுகின்றார்

என்னையும் மதித்துப் பாங்குடனே
என்றும் அறிவுரை சொல்லிடுவார்
அன்னை போன்ற என்மகளை
அன்பாய் பேத்தி என்றிடுவார்

இவரைப் போலப் பதிவுலகில்
எல்லாப் பதிவரும் இருப்பீரே
எழிலாய் தமிழைப் போற்றியே
இணைந்தே மகிழ்ந்தே வருவீரே


(கவியாழி)


Monday, 15 September 2014

மனிதம் போற்றி வாழ்வோம்...

மழையுமில்லை பனியு மில்லை
மக்கள் மனதில் மகிழ்ச்சி யில்லை
உழைப்புக் கேற்ற ஊதிய மில்லை
உழவன் மனமோ ரொம்பத் தொல்லை

நகர வாழ்க்கை விரும்ப வில்லை
நடந்து செல்ல பாதையும் மில்லை
அடுத்த வீட்டு நட்பு மில்லை 
அன்புகொண்டு பேசவு மில்லை

வணிகன் கடைகள் திறப்ப தில்லை
வயித்துக் கேற்ற உணவு மில்லை
பிழைப்புக்கேற்ற ஊதிய மில்லை
பிழைக்க வழியும் தெரிய வில்லை

பிள்ளைப் படிப்பை முடிக்கவில்லை
பீசு கட்ட கையில் பணமுமில்லை
படித்து முடித்தும் வேலையு மில்லை
பசங்க வாழ்வும் நிம்மதி யில்லை

பிறந்த வாழ்வை முடிக்க வேண்டி
பிழைகள் கண்டு மனமும் வெம்பி
உலக நடப்பை மனதில் எண்ணி
உணர்ந்து வாழ்வோம் மனிதம் போற்றி

(கவியாழி)


Friday, 12 September 2014

இன்று இதமாய் இருக்கிறது

இதமான காலை இன்று
இன்பமாய் இருக்கத் தோணுது
நலமாக மனமும் வளமாய்
நல்லதே சொல்ல எண்ணுது

காலை வேளையில் காற்றும்
கதைகள் பலதைச் சொன்னது
கண்கள் இரண்டும் எதையோக்
காணவேண்டி மேலே பார்க்குது

செடியும் பூச்சியும் செல்லமாய்
சேட்டை சிலதைப் பண்ணுது
சேவலும் நாய்களும் இன்பமாய்
சாலையில் திரிந்து ஓடுது

மரங்கள் எல்லாம் இன்றும்
மகிழ்வாய் சிரித்து மகிழுது
மாலையில் இருப்பது போலவே
மனதில் எதையோ தேடுது

மழையும் இதையே கண்டு
மறுபடி மறுபடி சிரிக்குது
மக்களும் மழையைப் பார்த்து
மகிழ்ச்சியாய் ஆடத் தூண்டுது


(கவியாழி)

Wednesday, 10 September 2014

புகழோடு மீண்டும் வருவேன்......

எதாச்சும் சொல்ல நினைச்சா
எல்லாமே மறந்து போச்சு
யாராச்சும் கேட்க நினைச்சா
என்னான்னு சொல்லித் தாங்க

பேரெல்லாம் ஊரெல்லாம் எனக்குப்
புரியாமல் தெரியாமல் ஆச்சு
பெரும்பாலும் எல்லோர்க்கும் இதனால்
வருத்தமே பெருகிப் போச்சு

ஏதோதோ எழுத விரும்பி
எந்நாளும் ஆர்வம் இருந்தும்
போதாத நேரத்தாலே தொடர்ந்து
பொழுதும் எழுத முடியல

தீராத தலைவலியே  நிதமும்
தீர்க்காமல் தொடர்ந்து நின்று
ஆறாத மனக் குறையாய்
அன்றாடம் முன்னாள் வருது

தீராத மனக் குறையைத்
தீர்க்கவே தொடர்ந்து சென்று
போராடிச் ஜெயிப்பேன் மீண்டும்
புகழோடு மீண்டும் வருவேன்

(கவியாழி)

Thursday, 4 September 2014

கல்லறை வரையில் துணையே.......

இதயம் அடிக்கடித் துடிக்கும்
இமையும் இணைந்தே அடிக்கும்
கருவைச் சுகமாய்ச் சுமக்கும்
கருவறை சிறையாய் இருக்கும்

பிறந்ததன் கதைகளைச் சொல்லி
பெரியவர் வரையில் தொடர்ந்து
உழைக்கும் மனித வாழ்க்கை
உறவுகள் இணைந்தால் சிறக்கும்

இளமைக் கனவுகள் பலிக்கும்
இணைந்ததும் சுகமாய் இருக்கும்
பிறவிப் பலனை அடைந்தே
பெரியவராக்கி உண்மையைச் சொல்லும்

உறவுகள் தொடந்தே வாழும்
உரிமைகள் மகிழ்ந்தே தொடரும்
பிரிவைத் வெறுத்தே ஒதுக்கும்
பிள்ளைகள் இணைந்தால் மகிழும்

கடனே இல்லா வாழ்க்கை
கடந்தும் இருந்தால் நன்று
கல்லறை வரையில் துணையே
கிடைத்தால் வாழ்கை மகிழ்ச்சி


(கவியாழி)

Monday, 1 September 2014

மனிதனாக வாழ்க்கை முடியுமே

விலைவாசித் தாறுமாறா ஏறுது
விடிந்தாலே கடனெல்லாம் அழைக்குது
தரவேண்டிய வட்டியும் சேர்த்ததும் 
தலைமேல முடியெல்லாம் கொட்டுது

பணக்காரன் வசதியும் பெருகுது
பணத்தாலே எல்லாமே முடியுது
மருந்தாலே வாழ்கையை ஒட்டியும்
மளமளன்னு பணமோ சேருது

விலைவாசி உயர்வை எண்ணியே
விவசாயி மனசும் எரியுது
நிலமெல்லாம் தண்ணீர் குறைச்சலால்
நெடுந்துயர்ந்த வீடாய் மாறுது

பிழையாக படிக்க மறந்த
பிள்ளையின் மனசும் தவிக்குது
நெடுநாட்கள் படிப்பை முடித்தும்
நிம்மதியாக வேலை மறுக்குது

அரசாங்கம் கடமை தவறியே
அநியாயம் வளர  தொடங்குது
அதனாலே பலபேரின் வாழ்க்கை
அடங்காத செயலைத் தூண்டுது

பலபேர்கள் மடிந்து சாவதற்கு
பணம் ஏனோ தகுதியாகுது
மனம்மாறி பகிர்ந்து வாழ்ந்தாலே
மனிதனாக வாழ்க்கை முடியுமே



(கவியாழி)

Monday, 25 August 2014

இனிப்பான மனிதர்கள்

வெள்ளைச் சோறு மட்டுமே
விரும்பி உண்டு வந்தோர்
வேதனையாய் இன்று ஏனோ
வேண்டாமெனத் தள்ளி வைத்து

பச்சைக் காய்கறிகள் தின்று
பகல் வருமுன்னே விழித்து
பாதம் வலிக்க நடந்தும்
பயிற்சிகள் பலவகை செய்தும்

உணவைக் கொஞ்சமாய்  குறைத்து
உலர் பழங்கள் அதிகம் சேர்த்து
உண்டதை எல்லாமே மறந்து
உடலை வருத்தியே தினமும்

காலை மாலையென பகிர்ந்தே
கணக்காய் உணவைத் தின்று
வேளை வரும்போது மாத்திரையை
வேதனையுடன் தின்று வாழும்

இனிப்பை மறந்தும் இனிமையாய்
இன்னும் மன உறுதியுடன்
சிறப்பாய்  வாழ்ந்து வரும்
சொந்தங்களே நட்புகளே வாழ்க


(கவியாழி)

Tuesday, 19 August 2014

அடங்காத முத்தங்கள் ஆயிரம்

ஆயிரம் முத்தம் தந்தும் 
அடங்காத ஆசை கொள்வாள் 
அடுத்தவர் முன்னே மகிழ்ந்து 
அணைத்து மீண்டும் தருவாள் 
தீராத அன்புடனே இருப்பாள் 
தினமும் ஆவல் கொண்டே 
திரும்பத் திரும்ப உணர்வாய் 
கரும்புபோலக் கடிப்பாள் 


தேக்கிவைத்த ஆசையெல்லாம் 
தீர்க்கவே தினமும் கட்டியனைத்தே 
திகட்டத் திகட்டத் தருவாள் 
தீரும்வரை இணைந்தே மகிழ்வாள் 
வெளியில் தெரியாத வெட்கத்துடன் 
வீட்டில் புகுந்ததும் கொடுப்பாள் 
வெளியூர் சென்றால் ஏங்கியே 
வேதனையைத் தீர்ப்பாள் வந்ததும் 

கட்டியணைத்து முத்தம் தந்து 
கன்னத்தைக் கடித்தும் விடுவாள் 
காலையும் மாலையும் தொடர்ந்து 
கதைகள் கேட்டும் தருவாள் 
நெஞ்சின் மீதேறி நெடுநேரம் 
நிம்மதியாய் தூங்கி விடுவாள் 
நேரத்தைக் குத்தகை கேட்டு 
நீண்ட நேரம் முத்தமிடுவாள் 

சத்தமில்லா முத்தங்கள் எத்தனை 
தித்திக்குமே என்றென்றும் அதனை 
வாடிக்கையாய் கிடைத்தால் தினமும் 
வாராது துயரம் அதனால் 
அன்பான முத்தங்கள் இழந்தே 
அருகில் யாரும் உள்ளாரோ 
இனிமை மறந்த முத்தம் 
இடுவோர் யாரும் உளரா 


(கவியாழி)

Sunday, 17 August 2014

அவளன்றி மகிழ்வேது

அன்பானவள் எனக்கே அழகானவள்
அனைத்திலும் என்னை அறிந்தவள்
பண்பும் தெரிந்தவள் பாசக்காரி
பழகுவதில் சிலநேரம் ரோசக்காரி

எப்போதும் என்னையே சார்ந்தவள்
எவ்விடமும் உரிமையாய் திட்டுபவள்
முன்கோபம் வந்தால் பத்ரகாளி
முடியாத நேரத்தில் பங்காளி

முன்பொழுதில்  தினம் எழுவாள்
மூன்று வேலையும்  சமைப்பாள்
முகம் மலர்ந்தே உணவை
முன்னே வந்து பகிர்வாள்

கட்டளைப் போடும் எசமானி
கஷ்டம் வந்தால் உபதேசி
சித்திரை வெயிலாய் சிலநேரம்
சிடுசிடு வென்றே தகதகப்பாள்

ஆனாலும் எப்போதும் அன்பானவள்
அகிலமே வாழ்த்துகின்ற பண்பானவள்
அவளன்றி வாழ்வே இருக்காது
அருகின்றி எனக்கே மகிழ்வேது

(கவியாழியின் மறுபதிவு)





Friday, 15 August 2014

சுதந்திரம் எமக்கும் வேண்டும்



வேண்டும் வேண்டும் மனதில்
வேதனை மறைந்திட வேண்டும்
தாண்டும் உயரம் யாவும்
தடைகளைத் தாண்டிட வேண்டும்

சுதந்திரம் எமக்கும் வேண்டும்
சூழ்நிலை மாறிட வேண்டும்
மனிதருள் ஒற்றுமை வேண்டும்
மகிழ்ச்சியைப் பகிர்ந்திட வேண்டும்

வாழ்வில் நிம்மதி வேண்டும்
வசந்தமும் மீண்டும் வேண்டும்
வலையில் மீண்டும் எழுதும்
வாய்ப்புகள் தொடர்ந்திட வேண்டும்

மீண்டும் மீண்டும் உங்களை
மகிழ்ச்சியாய் சந்திக்க வேண்டும்
தீண்டும் பணிகள் யாவும்
தீர்ந்திட நிம்மதி வேண்டும்



அனைவருக்கும் சுதந்திரதின வாழ்த்துக்கள்

(கவியாழி)

Wednesday, 28 May 2014

இந்த நிலைக்குக் காரணம் யார்?

வனமும் வனப்பையும் இழந்ததால்
வனத்தின் நிறமும் மாறுமாம்
வானமும் இயல்பை மாற்றியே
வானத்தின் தன்மையும் கூடுமாம்

எல்லா இடமும் வெளிச்சமாய்
எங்கும்  வெய்யில் எரிக்குமாம்
ஏரிக் குளமும் வற்றுமாம்
எரிச்சல் அதிகம் இருக்குமாம்

பொல்லா நிலையால் பலபேரோ
பொசுங்கி மடிந்தே விழுவாராம்
பொழுதும் கழிந்தால் மட்டுமே
பொறுத்தே வெளியில் வருவாராம்

இந்த நிலைக்குக் காரணம்
இழந்த மரங்கள் அதிகமாம்
இதையே நாமும் அறிந்தேனும்
இனிமேல் மரங்கள் வளர்க்கணும்

மழையும் நன்றாய் பெய்யுமாம்
மரங்கள் அடர்ந்து வளருமாம்
மக்கள் துயரம் நீங்கியே
மக்கள் மனமும் குளிருமாம்

வானம் மகிழ்ந்தே குளிர்ச்சியாய்
வருடம் முழுக்க பெய்யுமாம்
வாழ்வில் இதையே  மகிழ்ச்சியாய்
வானத்தைப் பெருக்கிக் காக்கணும்


=====கவியாழி=====


Wednesday, 14 May 2014

உண்மை வாழ்வு...

முதுமையைத் தேடி செல்பவர் யாரோ
முறையாய் அதையும் தடுப்பவர்  உளரோ
மூன்றும் மூன்றும் ஒன்பதைத் தவிர்க்க
முடிந்தால் கணக்கை மாற்றிடத் துணிவோ

காலைமாலை என்பது உண்மை என்றால்
கடவுளும் செயலும் நம்பிக்கை என்றால்
நேரமும் பொழுதும் மாறுதல் நன்றாம்
நிம்மதியைக் கெடுப்பது மட்டும் எதனால்

சொல்வோர் சொல்லும் சொற்கள் யாவும்
சொல்லா நிலையில் தவிர்த்திட முடிந்தால்
எல்லோர் வாழ்வும் நிம்மதி கொண்டே
எளிதில் சொல்லால் மடிந்திட மாட்டார்

அவரவர்  வாழ்கையை வாழ்ந்திட நினைத்தால்
அவரால் முடிந்தால் உதவிகள் செய்தால்
அன்பும் அறமும் ஓங்கி வளர்ந்ததால்
அகிலம் முழுதும் அன்பே வாழும்

படைப்பில் நிறைய அர்த்தங்கள் உண்டு
பகலும் இரவும் செய்யும் நிகழ்வால்
கிடைக்கும் மகிழ்ச்சி நிலைப்பது போல
கிடைத்த அனைத்தும் மகிழ்ச்சியே என்று


(கவியாழி)






Monday, 12 May 2014

புருசனையே காவல் வைத்து.....

தண்டசோறு தின்னாலும் புருஷன்
தன்னருகே வேண்டுமென்றும்
தன்குடும்பம்பிள்ளையோடு
தானும் வாழ்க்கை வாழ வேண்டி

ரெண்டுவேளைக் கோவிலுக்கும்
ராப்பகலாய் வேலை செய்தும்
கண்டவரும் மெச்சும்படியும்
கண்கலங்கா வைத்திருந்து

பெண்டுபிள்ளை இந்த காலத்தில்
பத்தினியாய் வேலைசெய்து
பிள்ளைகளைக் படிக்க வைத்து
புருசனையே காவல் வைத்து

கண்டதையும் திண்ணாமல் வீட்டில்
காத்திருக்கும் வீட்டுக்காரன் பிள்ளைக்குமாய்
சொத்துபத்து சேர்த்து வைத்து
சொன்னபடி கடனைக் கட்டியே

உண்ண மறுத்தாலும் தொடர்ந்து உழைத்து
உறங்க மறந்தாலும் குடும்ப நலனாய்
எண்ணம் முழுதும் கணவன் வாழ
எல்லா கோவிலுக்கும் செல்வது முறையா


(கவியாழி)


Friday, 9 May 2014

விதியா? விஞ்ஞானமா?

எல்லா நொடியும் செல்வதுபோல
எல்லோர் மனமும் செய்வதுபோல
சொல்லா நிலையில் செய்ததுபோல
செய்தால் தவறும் இருந்திடாதோ

நல்லது என்றே நாளும் செய்து
நடப்பவை அனைத்தும் நல்லதே என்றும்
நாட்கள் முழுதும் செய்யும் செயலில்
நலிந்த செயலும் உள்ளது  முறையா

மதிதான் சொல்லும் செயலை செய்து
மக்கள் மனதில் இடமும் பிடித்தும்
மறந்தும் செய்யும் செயலை எண்ணி
மறுபடி எண்ணி வருத்துதல் தவறா

பிணியைப் போக்க மருந்தும் உண்டு
பிழையாய் அதனால் நிகழும் செயலும்
துணையாய் எண்ணி மருத்துவர் ஏனோ
தொடர்ந்து இன்னும் கொடுத்தல் நன்றோ

எல்லோர் மனமும் ஏக்கம் இன்றி
எல்லா தினமும் மகிழ்ச்சி கொண்டால்
பொல்லா நிலையும் அன்றி வாழ்ந்தால்
பொழுதும் விதியை மறுத்து வாழ்வோம்

விதியென்று நான் நம்ப மறுத்தும்
விளையாட்டாய் எண்ணி தவிர்த்தால்
விஞ்ஞானம் ஏன் என்னைத் திருத்தி
வீண் செயலை ஏன் தடுக்கவில்லை


(கவியாழி)

Wednesday, 7 May 2014

விதியின் செயல்......

சிறிதாய் மனதில் காயம் பட்டாலும்
சிதறி ஓடுமாம் சில்லறை போல
பெரியோர் மனதும் வெம்பித் தவித்து
பெரும் வேதனையில் வெந்தே போகுமாம்

வருவோர் துயரம் அறியாமல் தெரியாமல்
வந்ததும் சொல்லும்  வார்த்தை யாலும்
பெரிதாய் ஏதும் மாற்றமும் மின்றி
பெருகியே வருந்தியே  கடனாய்ச் சேர்க்கும்

உரியோரும் உற்றாரும் சொன்னால் கூட
உதவிக்கு உழைப்பையும் தந்தால் கூட
பணமும் பொருளும் கொடுத்தாலும் கூட
படைத்தவன்  வந்தாலும் தோஷம் தீருமா

எல்லோர்க்கும் வந்திடும் இந்த நிலை
எப்படி தீர்ந்திடும் எப்போது மாறிடும்
தப்பாமல் தவம் செய்தாலும் மாறா
தங்கியே கடனை தீர்க்கும் மாயை

விதியாய் வந்ததாய் சொல்வார் சிலர் 
விரைவில் தீர்ந்திடும் கடவுள் நினைத்தால்
மதியால் வெல்ல முடியா தருணம்
மனிதன் படைப்பில் யாவர்கும் பொதுவோ



(கவியாழி)



Thursday, 1 May 2014

கடவுளைக் கண்டால் சொல்லுங்களேன்.......


கடவுளைக் கண்டால் உடனடியாய்
கண்டவர் வாழ்க்கைச் செழித்திடவே
உடனே வரமும் கேட்பீரே
உயரும் நிலையைப்  பெறுவீரே

கடனே இல்லாத வாழ்க்கையைக்
கஷ்டம் தராத நாட்களை
தடமே முடியா பாதையை
தெரிந்தும் சொல்லச்  சொல்வீரோ

பகைமை இல்லா உறவுகள்
பணமே கேட்கா நண்பர்கள்
குணமே புரிந்த மனைவியும்
கொடுமை சொல்லா பிள்ளையும்

படமே எடுக்கா நாகமும்
பயமே இல்லா பறவையும்
பசுமை எங்கும் மாறாத
படைப்பை கேட்டுப்  பார்த்தீரா

எதிலும் மகிழ்ச்சி கிடைக்கவே
என்றும் முயற்சி செயிக்கவே
எண்ணம் முழுதும் உண்மையாய்
எப்படி உதவி செய்வாரோ

மனதில் என்றும் அன்புடனே
மற்றவர் உயர வார்த்தைகளை
தினமும் ஒருவர் என்றழைத்து
தெரிந்த  வரத்தைக் கொடுப்பாரோ

நன்மை செய்ய சொல்லுங்கள்
நல்லவர் பெருக வாழ்த்துக்கள்
நாளும் மகிழ்ச்சிப் பெறவே
நல்ல வரங்களைக் கேளுங்கள்


(கவியாழி)




Wednesday, 30 April 2014

சிந்தை யது மங்கும்.....

சிந்தை யது மங்கும்
சித்தம் மழுங்கி நடுங்கும்
வித்தை செய்யும் மனதால்
விடியும் வரை கலங்கும்

சொந்தமும் தள்ளி வெறுக்கும்
சொல்லைக் கேட்க மறுக்கும்
சந்தங் களின் றின்றி
சரீரம் அதிரக் கத்தும்

வேந்தன் முதல் வீரன்
வேட்கை யுள்ள யாரும்
விரும்பி அருகில் வந்தால்
வெட்டித் தலை சாய்க்கும்

எங்கும் இருள் பரவி
இருட்டாய் மனதுள் இருக்கும்
அருகில் வர பயந்தே
ஆட்டமாய் ஆடி ஒடுங்கும்

தூக்க மின்றித் தவித்தே
துயரம் கொள்ளும் மனிதன்
தீர்க்க வரும் நிகழ்வால்
துயரம் பறந்தே போகும்


(கவியாழி)

Monday, 28 April 2014

நட்பை நானும் மறக்கவில்லை

பணத்தை நானும் மதிப்பதில்லை-அதனால்
பணமும் என்னிடம் தங்குவதில்லை

தப்பாக நட்பை சொன்னதில்லை-இன்றும்
தவறாக யாரிடமும் பழகுவதில்லை

தோல்வியின் முகத்தை ரசித்ததுண்டு-அங்கே
தோழனின் நட்பை கண்டதில்லை

விடியும்வரை நான் காத்திருந்து -விளக்கை
விரைந்தும் அணைத்த தில்லை

துணையாய் நானும் இருந்ததுண்டு-அன்பாய்
துணிந்து நெருங்கி வந்ததுண்டு

நன்றி மறந்து வாழவில்லை-அதையும்
நானும் மறுத்துப் பேசவில்லை

கொள்கை மறந்து நினைவில்லை-என்றும்
கோழையாக நானும் விரும்பவில்லை

இத்தனை தூரம் வருவதற்கு-நட்பே
இணைத்து வந்ததை மறக்கவில்லை

(கவியாழி)

Thursday, 24 April 2014

குழந்தைப் பாட்டைப் பாடுங்கள்

பூஜ்யமும் ஒன்றும் ஒன்று
புவியில் பிறந்திட்டாய்  இன்று
0+1=1

ஒன்றும் ஒன்றும் இரண்டு
அப்பா அம்மா இரண்டு
1+1=2
இரண்டும் ஒன்றும் மூன்று
உன்னோடு சேர்த்து மூன்று
2+1=3
மூன்றும் ஒன்றும் நான்கு
பாப்பா பிறந்தால் நான்கு
3+1-4
நான்கும் ஒன்றும் ஐந்து
தாத்தா பாட்டியும் ஐந்து
4+1=5
ஐந்தும் ஒன்றும் ஆறு
நண்பனைச் சேர்த்தால் ஆறு
5+1=6
ஆறும் ஒன்றும் ஏழு
புறப்படும் நேரம் ஏழு
6+1=7
ஏழும் ஒன்றும் எட்டு
படிப்பில் கவனத்தை எட்டு
7+1=8
எட்டும் ஒன்றும் ஒன்பது
தூங்க செல்வாய் ஒன்பது
8+1=9
ஒன்பதும் ஒன்றும் பத்து
உணரும் வயதும் பத்து
9+1=10

Tuesday, 22 April 2014

ஏற்காட்டில் செய்த சமூக நலப்பணிகள்

    1980 ம் ஆண்டு கல்லூரியில் சேர்ந்தபோது  NCC,NSS  போன்ற சமூகப்பணி செய்யும் வாய்ப்பு கிடைத்தது. படிக்கும்போதே   வாய்ப்புக் கிடைத்ததால் நான் பல முகாம்களில் பங்குகொண்டு கிராமங்களுக்குச் சென்று சுகாதாரம் பற்றிய விழிப்புணர்வு ,மாணவர்களுக்கு கல்விப் பற்றிய அறிவுரைகள் கோவில்களுக்கு வெள்ளையடித்தல் சாலை வசதி மேம்பாடு போன்ற சமூக அக்கறை கொண்ட பணிகளில் நாட்டம் ஏற்பட்டது,

எனக்கு ஏற்பட்ட சமூக சேவை ஈடுபாடு காரணமாக சேலத்தில் இயங்கி வந்த சேலம் மிட்டவுன் ஜேசிஸ் சங்கத்தில் உறுப்பினரானேன் .அங்கு பல சமூக சேவைகள் செய்யும் நிகழ்சிகளில் பங்கேற்கும் வாய்ப்பும் எனக்கு கிட்டியது இதன் காரணமாக இதையே நாம் தொடர்ந்தால் என்ன என்ற எனக்குள் மனதில்  ஏற்பட்ட கேள்வியின் காரணமாகவே பின்னாளில் ஏற்காட்டில் எனக்கு சமூக சேவை செய்யும் எண்ணத்திற்கு தூண்டுகோலாய் இருந்தது.

      1986 ம் ஆண்டு நிரந்தர அரசாங்க பதவி நான் விரும்பிய எற்காட்டிலேயே காப்பீட்டுத்துறை வளர்ச்சி அதிகாரியாக நிரந்தர வேலையில் பணி நியமனம் செய்யப்பட்டேன்.பணி நிமித்தமாக நான் எல்லா வங்கிகளுக்கும் சென்று வந்ததால் என்னைப் போன்ற இளையோர்களுடன்சேர்ந்து பழகும் வாய்ப்புக் கிடைத்தது . நான் பணிபுரியும் யுனைடெட் இந்தியா காப்பீட்டு நிறுவனத்தில் கிராம மேம்பாட்டு விழாக்களை அங்குள்ள வங்கிகள் மற்றும் மலைவாழ் மக்கள் மேம்பாட்டு நிறுவனகளுடன் சேர்ந்து கால்நடை மருத்துவ முகாம் ,சமூக நல மேம்பாடு கூட்டங்கள் ஏற்பாடு செய்யும் வாய்ப்பு கிட்டியது.

ஏற்காடு ஜேசிஸ் என்னும் சர்வதேச சமூகப்பணியில் தலைவராக பொறுப்பேற்றபோது எடுத்தப்படம்
திரு..பீ.ஜீ. ராஜன் மாநிலத் தலைவர்,நான் நிறுவனத் தலைவர். ஏற்காடு ஜேசிஸ் சங்கம்,திரு.ராஜி. தலைவர்.சேலம் மிட் டவுன் ஜேசிஸ் சங்கம் ,சேலம்,திரு.ராஜாகோவிந்தசாமி மாநிலச் செயலாளர்,திரு.சேரலாதன் ,செயலர்.சேலம் மிட்டவுன் ஜேசிஸ் சங்கம் 


ஏற்காட்டில்1989 ம் ஆண்டு  நடைபெற்ற கோடை  விழாவின் போது ஜேசிஸ் சங்கம் சார்பாக  பரிசளிப்பு விழா நடத்தியபோது அப்போதைய சேலம் மாவட்ட காவல்துறை கண்காணிப்பாளர் திரு.காசிவிஸ்வநாதன் அவர்களுடன் நான்


கைப்பந்து,கேரம் .வளைபந்து போன்ற விளையாட்டுத் துறையிலும் ஆர்வம் இருந்ததால் 1990 ம் ஆண்டு சேலம் மாவட்ட கேரம் கழகம் செயலாளராய் என்னை நியமனம் செய்தபோது  எடுத்தப்படம்

ஏற்காட்டில் பட்டிப்பாடி வேலூர் என்னும் கிராமத்திலுள்ள பள்ளியைத் தத்தெடுத்து அங்கு படிக்கும் மாணவர்களுக்கு சமூக மேம்பாடு பற்றிய விழிப்புணர்வு,விளையாட்டு மற்றும் மாணவர்களுக்கு இலவச புத்தகங்கள்  மற்றும் பள்ளிக்கு கடிகாரம் போன்றவை வழங்கியபோது எடுத்தப்படம்
சேலம் மாவட்ட கலெக்டர் ஆக பணிபுரிந்த திரு.பாருக்கி I.A.S அவர்கள் சேலத்திலிருந்து ஏற்காடு மலைப்பாதையில்  நடந்து வந்து இயற்கை காடுகளை காப்பது பற்றிய விழிப்புணர்வு நடைபயணம் மேற்கொண்டதை பாராட்டி கோடைவிழாவில்   வாழ்த்தியபோது எடுத்தப்படம்.

இதுபோன்ற சமூக அக்கறையுள்ள பல நிகழ்வுகளில் என்னை ஈடுபடுத்தி என்னால் முடிந்த உதவிகளை எனது நண்பர்கள் மூலமாகவும் ஏற்காடு ஜேசிஸ் சங்க தலைவர் என்ற முறையிலும் நான் பணிபுரியும் யுனைடெட் இந்தியா காப்பீடு நிறுவனத்தின் சார்பாகவும் இவ்வாறான சமூகப் பணிகளில் என்னை ஈடுபட எனது பெற்றோரும் என்னை ஊக்கப் படுத்தியதை எண்ணியும் அன்று நான் செய்த பணிகளைநினைத்துப் பெருமையாக அன்றிரவு மகிழ்ச்சியாய் ஏற்காட்டில் தூங்க  முடிந்தது.



(கவியாழி)

Monday, 21 April 2014

அவரவர் வாழ்கையை வாழுங்கள்

அம்மா வாழ்ந்த காலத்திலும்
அடிமை யாக இருந்ததில்லை
அப்பா தாத்தா பாட்டியிடம்
அன்பாய் இருக்கத் தவற வில்லை

எல்லோர் சொல்லையும் கேட்டறிந்து
எந்த முடிவும் செய்திடுவார்
இல்லா நிலையிலும்  உள்ளதையே
இனிமை யாகச் சொல்லிடுவார்

வசதி யான வாழ்க்கைக்கு  
வெளியில் வேலைக்குச் சென்றதில்லை
வருவோர் போவோர் நண்பரிடம்
வீட்டுச் சண்டையைச் சொன்னதில்லை

இப்போ நிலைமை மாறியது
இனிமை வாழ்வும் மறைந்ததுவே..
தப்பாய் எண்ணும் பழக்கத்தால்
தனியாய்ச் செல்லும் நிலையானது

பிரிந்தே வாழ்ந்து வந்தாலும்
பொறுப்பாய் இணைந்தே உழைத்தாலும்
இருந்தும் சண்டை வருகிறதே
இல்லற வாழ்வும் கசக்கிறதே

அமைதி யான  வாழ்க்கைக்கு
அன்பாய்ப் பரிவாய்ப் பேசுங்கள்
அடுத்தவர் பேச்சைக் கேட்காமல்
அவரவர் வாழ்க்கையை வாழுங்கள்


Saturday, 19 April 2014

நான் பார்த்த ஏற்காடு

எனது முதல் ஏற்காடு பயணம் 

        நான் ஏற்காடு முதலில் சென்றது )சைக்கிளில் (மிதிவண்டி)அதாவது ஒரு ரூபாய் கொடுத்து பேருந்திலோ அல்லது சுமையுந்திலோ மேலே வைத்துவிட்டு மலையில் உள்ள ஏரிக்கு அருகில் இறங்கி அங்கு ஊர் சுற்றிவிட்டு பின்னர் மிதிவண்டியி லேயே இறங்கி வரவேண்டும்  என எனது அண்ணன் சித்தப்பா மகன் சந்திரசேகர் கூறினார். ஏறக்குறைய இருபத்து மூன்று கிலோமீட்டர் மலைப்பாதையில் உன்னால் தைரியமாய் வர முடியுமா என்றார்

      அப்போது வயது பதினேழு இருக்கும்  எனக்கு மனதில் பயம் இருந்தாலும் உடனே சரி போகலாம் என்று சொல்லி சனிக்கிழமை விடுமுறை என்பதால் அன்றே செல்லத் தீர்மானித்தோம் .நான் படிக்கும்போதே எனது படிப்புச் செலவுக்காக எனது தாய் தந்தையரை துன்புறுத்தாமல் நானே சுயமாக சம்பாத்தித்து வந்தேன் அதனால் என்னிடம் எப்போதும் சேமிப்பு வைத்திருப்பேன் அதிலிருந்து இருபது ரூபாய் செலவு செய்வது என தீர்மானித்து விரும்பியபடியே சென்றேன்.

       பேருந்தில் இரண்டு ரூபாய் பயணக் கட்டணம் ஒருரூபாய் மிதிவண்டிக்கு  ஒரு ரூபாய் என(2+1=3) மூன்று ரூபாய் இருவருக்கும் ஆறு ரூபாய் செலவு செய்து காலை 8.00 மணிக்குப் புறப்பட்டு ஒருமணி நேரத்தில் மலை உச்சியை அடைந்து சில இடங்களை சுற்றிவிட்டு மதிய உணவு  ரூ.5  இருவருக்கும் பத்து ரூபாய் போக மீதியுள்ள பணத்தில் வழியில் கண்ட குரங்குகளுக்காக பொறி கடலை வாங்கி புறப்பட்டோம்.

        அன்று  ஏற்காடு ஏரியில் படகு சவாரி செய்தும் ஏரிக்குஅருகிலுள்ள பூங்காவில் விளையாடியும் மகிழ்ந்தோம்.மேலும் லேடிசீட் என்னும் பகுதியிலிருந்து பார்த்தால் சேலம் நகரும் மேட்டூர் அணையும் டால்மியா தொழிற்ச்சாலைகள் என்று காண முடியும் அடுத்து பக்கோடா பாயிண்ட் ,ரெட்ரிட் போன்ற பகுதிகளுக்கு மிதிவண்டியிலேயே  சென்று விட்டு மாலை நாலு மணிக்கு வீடு திரும்ப விரும்பினோம்.

         இருபது கொண்டைஊசி வளைவுகள் கொண்ட மலையில் எப்படி நிதானமாய் இறங்கவேண்டும் என்று பேசிக் கொண்டேபல பகுதிகளுக்கும் சைக்கிளிலேயே சென்று வந்த அனுபவம்  இருந்ததால் எனக்கும் தைரியம் வந்தது. நாங்கள் கையில் இரண்டு பழுதுபார்க்கும் கருவிகள் வைத்திருந்ததால் மிதியுந்தை சரிசெய்துகொண்டு  புறப்பட்டோம் .நான் முதலில் தடுமாறினேன் பின்னர் சுதாரித்துக்கொண்டு இறங்கினோம்.

      வரும் வழியில் பதிமூன்றாவது கொண்டைஊசி வளைவில் முனீஸ்வரன் கோயில் உள்ளது அங்கு சிறிது நேரம் இளைப்பாறி  விட்டு மீண்டும் மிதிவண்டியை சரி செய்து கொண்டு புறப்பட்டோம். அங்கு ஆங்கிலேயரால் கட்டப்பட்ட நாற்பது அடி ,அறுபது அடி ஆகிய இரண்டு பாலங்களை கடக்கும் முன் அங்கு சுற்றித்திரியும் குரங்குகளுக்கு பொறி கடலையை இருவரும்  சாலையோரத்தில் பாதுகாப்பாய் தூவி விட்டு மீண்டும் பயணத்தைத் தொடந்தோம்.

       வெற்றிகரமாக பயணத்தை முடித்து மாலை ஆறுமணிக்கு வீட்டுக்குச் சென்றால் அங்கு என்னைக் காணாமல் தவித்த அப்பாவிடம் உண்மையை மறைக்காமல் நடந்ததைச் சொன்னதும் வழக்கம்போலவே அர்ச்சனையும் பூசையும் கிடைத்தது, சில நாள் கழித்து நானும் உன்வயதில் சென்றிருக்கிறேன் நீ என்னிடம் சொல்லி இருந்தால் நானும் உடன் வந்திருப்பேனே என்று சொன்னது மறக்கமுடியாதது.

       அதன்பின் பலமுறை மிதிவண்டிப் பயணம் சென்றிருக்கிறேன்.சிலபல விபத்துக்களையும் சந்தித்திருக்கிறேன்,ஆனாலும் மிகவும் கடினமான அவசியமில்லாத பயணம் என்றே இன்று நான் சொல்ல விரும்புகிறேன்.



(கவியாழி)


Wednesday, 16 April 2014

இன்பசுற்றுலா - ஏற்காடு




"ஏழைகளின் ஊட்டி ஏற்காடு  "


           ஏழைகளின் ஊட்டி  என்றழைக்கப்படும் ஏற்காடு சேலம் மாவட்டத்தில் சேலம் நகரிலிருந்து  முப்பது கிலோமீட்டர் தொலைவில் இருபது கொண்டை  ஊசி வளைவுகளுடன்  கடல் மட்டத்திலிருந்து சுமார் 1850  அடி உயரத்தில்  இருக்கிறது


ஏற்காடு  ஏரியின் எழில் மிகுத் தோற்றம்

      நான் 1981-1992 வரை ஏற்காடு பகுதியில் நான் பணிபரியும் யுனைடெட் இந்தியா காப்பீடு நிறுவனத்தின் வளர்ச்சி அதிகாரியாக பணிபுரிந்தேன்.அன்று பணி நிமித்தமாக நான் சுற்றித் திரிந்த நாட்களில் இருந்த தோற்றம் இன்று காலப்போக்கில் மாறி விட்டது. தற்போது நிறைய தங்கும்  விடுதிகள் கட்டப்பட்டு போக்குவரத்தும் மிகுதியாகி இருக்கிறது.அதற்கேற்றாற்போல் சாலை வசதியும் மேம்பட்டிருக்கிறது



இந்த ஏரியின் நீர்பிடிப்புப் பகுதியில் இருந்து செல்லும் உபரி நீரே கிள்ளியூர் நீர்வீழ்சியாய்  கொட்டிக் கொண்டிருந்தது  தற்போது  ஏரியில் நீர்மட்டம் குறைந்ததும்  அருவி இருக்குமிடம் தெரியாமல் கட்டிடங்களாய் மட்டுமே உள்ளது


        இந்த முகத்துவாரத்தில்  உள்ள நீரேற்றும் நிலையத்தின் வாயிலாக இங்குள்ள அனைத்துப் பகுதிகளுக்கும் நீர் விநியோகம் செய்யப்படுகிறது.
நீங்கள் காணும் இந்த மரக்கட்டை மிக உயர்ந்த நாவல் பழம் மரமாக இருந்தது .மேலும் ஏரியைச் சுற்றி நிறைய கடுக்காய் மரங்களும் தைலமரங்களும் இருந்தது ஏரியின் அழகை  இன்னும் அதிகரித்திருந்தது.

        தற்போது எல்லாமே மாறி என் பழைய நினைவுகளைப் போல் நிறைய மறைந்துவிட்டது.எனது இளமைக் காலங்களில் இங்கு நான் கண்ட காட்சிகள் பழகிய நட்புகள் இளமைகால நினைவுகள்  என்னை மீண்டும் 24 வருடங்களுக்குப் பிறகு அங்கே அழைத்துச் சென்றது.இரண்டுநாள் தங்கினேன் சில நட்புகளையும் சந்தித்தேன்அந்த இனிய வசந்த காலத்தை மறக்க முடியாமல்  இன்னும் ஒரு தொடராய் எழுதுகிறேன்


(கவியாழி)

Monday, 14 April 2014

சித்திரை மகளே வருக.........

சித்திரை மகளே வருக
சீர்மிகு வாழ்வைத் தருக
சீரிய பணிகள் செய்தே
சிறப்புற ஆசியும் தருக

கற்பனை செய்யும் அறிவை
காலமும் எனக்குத் தருக
கற்றதில் உள்ள குறையை
கற்கத் தெளிவைத் தருக

அற்ப மனித பிறப்பில்
அன்பாய் நாளும் இருக்க
அப்பன் ஆத்தா ஆசிரியராய்
அறிவை இன்னும் தருக

உலகில் உள்ள உயிர்கள்
உயர்வாய் என்றும் இருக்க
உழவன் வாழ்வை சிறக்க
உடனே மழையைத் தருக

எத்தகு பணியும் எளிதில்
ஏற்றம் கிடைக்கச் செய்து
எளிமை வாழ்வை  வாழ
என்னுடன்  துணையாய்  வருக

நேசமும் நட்பும் சூழ்ந்தே
நிறையாய் வாழ்க்கை வாழ
நித்திரை நாளும் கிடைத்து
நிம்மதி மனதில் தருக

(கவியாழி)



Wednesday, 2 April 2014

வெட்கமாய் இருக்குது விளக்கணைங்க....

வெட்கமாய் இருக்குது விளக்கணைங்க
விடிந்ததும் சொல்லுறேன் தூங்கிடுங்க
சுத்தமாய் எனக்கு விருப்பமில்லை
சொல்வதைக் கேட்டு உறங்கிடுங்க

மிச்சமாய் எதுவும் தரவேண்டாம்
மேனியில் கையும் படவேண்டாம்
அச்சமாய் இருக்க வழியில்லையே 
அவங்களும் நமக்குத் துணையில்லையே

கூச்சமாய் எனக்கு இருக்குதுங்க
குறுகுறுன்னு எதுவோ ஓடுதுங்க
பேச்சினால் என்னை மடக்காதீர்
பிள்ளைக்குத் தெரிஞ்சா தவறில்லையா

மச்சினி இன்னும் ரகசியமாய்
மருமகள் இருந்தும் தெரிந்தவளாய்
துச்சமாய் எண்ணியே அவங்களெல்லாம்
தினமும் அடிக்கடி நடக்கிறதாம்

உங்களைப் பத்தித் தெரிந்துதானே
உடம்புல வலியும் மறந்துநானே
உள்ளுக்குள்ளே பயமாய் இருப்பதாலே
உடனே தள்ளிப் போயிடுங்க

சத்தியம் சொல்லி செய்யுறேண்டி
சங்கதி எதுவும் செய்யுலடி
மிச்சமும் தடவி அமுக்கிடுறேன்
முன்னம்போல் உடம்பும் இருக்குமடி

இப்பவே கழுத்து பரவாயில்ல
இடுப்புல வலியும் அதிகமில்ல
சுத்தமா முதுகுல வலியில்ல
சத்தியம் இன்னைக்குக் காத்திட்டிட்டீங்க


-----கவியாழி-----

(வயதாகி விட்டால் இப்படித்தான் நிலைமை இருக்குமோ?)

Sunday, 30 March 2014

இணையத்தால் இணைந்தோம் மகிழ்ந்தோம்-2

.

 இரண்டாவது நபராக திரு.துளசிதரன் அவர்களைத் தொடர்புகொண்டு பேசியபோது ஓ..மீசைக்கார நண்பரா என்று கேள்விகேட்டுவிட்டு அவரே தொடர்ந்து நிச்சயம் நான் உங்களைச் சந்திக்க வேண்டும்உங்களை எங்கு எப்படி எப்போது காண்பது என்று ஆசிரியருக்கே உரித்தான கேள்விகளால் மகிழ்வோடு கேட்டார்.நானும் திங்கட்கிழமை வந்து அன்றிரவே சென்னைத் திரும்ப இருக்கிறேன் என்றதும் ஏன் இன்னொருநாள் தள்ளிபோட முடியாதா என்று திரு.தேவதாஸ் அவர்களைப் போலவே கேட்டார்.


  நான் என் நிலையைச் சொல்லி அவசர வேலையாக வந்த காரணத்தினால் இப்போது முடியாது மற்றொருநாள் வருகிறேன் பிறகு பார்க்கலாமே என்றதும்  உடனே இல்லை இல்லை நண்பரே உங்களை நான் எப்படியும் பார்த்துவிட  வேண்டும் நான் பணி செய்யும் இடம் பாலக்காடு என்றும் பள்ளியில் ஆங்கில ஆசிரியராக பணிசெய்வதாகவும் இங்கிருந்து 180 கிலோ மீட்டர் தள்ளி எனது வீடு உள்ளதென்றும் திங்கள் வந்து வெள்ளியன்று வீடு திரும்புவேன் என்றும் சொல்லியதுடன் இன்றிரவு 10.30 மணிக்கு உங்களது தொடர் வண்டி பாலக்காடு வரும் அப்போது உங்களைச் சந்திக்க முடியுமா அல்லது தூங்கி விடுவீர்களா என்றார்."கரும்புதின்னக் கூலியா நண்பரை சந்திக்க சிரமமா" நிச்சயம் உங்களைச் சந்திக்கிறேன் என்றேன்.

சொன்னபடியே சரியாக பாலக்காடு தொடர்வண்டி நிலையத்தில் காத்திருந்தார். நான் வண்டியை விட்டு இறங்குவதற்குள் கவியாழி கவியாழி என்று கைபேசியிலும் பேசிக்கொண்டே அங்குமிங்கும் என்னைத் தேடியது "காதலன் காதலியைத் தேடுவதுபோல "எண்ணக் காணவேண்டிய ஆவல் அவசரத்தை உணர்ந்து கொள்ள முடிந்தது.அங்கு நடைமேடையில் என்னைக் கண்டதும் அவரது மகிழ்ச்சியை காண முடிந்தது முகமெல்லாம் புன்னகையோடு  தழுவிக் கொண்டார்.

உடனே இருவரும் புகைப்படம் எடுத்துக்கொண்டோம் அங்கு நடைமேடையில் இருந்தவர்கள் வியக்கும் வண்ணம் இருந்த சந்திப்பு ஐந்து நிமிடம் மட்டுமே அதற்குள் எங்களது இனிமையான அன்பான உணர்வுபூர்வமான அன்பை பகிர்ந்தோம்.அதற்குள் வண்டிப் புறப்படவே எனதுகையைப் பிடித்து  வண்டியில் ஏறுவதற்கு உதவினார்.இருவரும் புன்னகையுடன் கையசைத்து நன்றியை தெரிவித்து கொண்டோம்.


அதிகாலையில் சந்தித்த திரு.தேவதாஸ் நண்பரும் முன்னிரவில் சந்தித்த திரு.துளசிதரன் அவர்களையும் சந்திக்கும் வாய்ப்புக் கிடைத்தமைக்கு தமிழுக்கும் கூகுளுக்கும் தான் நன்றி சொல்லவேண்டும் .இருவருமே என்னை உபசரித்த விதம் எனக்கு மகிழ்ச்சியைத் தந்ததுடன் அவர்களும் மகிழ்ந்தது நான் முற்பிறவியில் இருவரும் உடன்பிறந்த சகோதரனாக இருந்திருப்பார்களோ என்றே எண்ணத் தோன்றியது மேலும் இன்னொருநாள் தங்க முடியவில்லையே என்ற ஆதங்கத்துடன்  விடைபெற்றேன்.

அடுத்தமுறை நமது இணைய நண்பர்களையும் அழைத்து வாருங்கள்  என்று இருவருமே சொல்லியது காதில் தேனாய் இருந்தது.நண்பர்களே நீங்களும் வெளியூர் சென்றால் ஆங்காங்கே பதிவுலக நண்பர்களைச் சந்தியுங்களேன் என்னைப் போலவே மகிழ்ச்சியாய் இருங்களேன். சந்திப்பை மற்றவர்களுடன் பகிர்ந்து கொள்ளுங்களேன்.


(கவியாழி)

Friday, 28 March 2014

இணையத்தால் இணைந்தோம் மகிழ்ந்தோம்

          நான் அவசர வேலையாக கேரளாவிலுள்ள  கொச்சின் நகருக்கு செல்வதாய் இருந்தேன்.நான் செல்லும் எல்லா ஊர்களிலும் ஏதாவதொரு இணைய நண்பர்களை சந்திக்க விரும்புவது வழக்கம் அப்படி செல்லும் முன் இணையத்தின் இணையில்லாத தவிர்க்க இயலாத அனைவரும் அறிந்த நண்பர் திரு.திண்டுக்கல்.தனபாலனிடம் கேரளாவில்  இணைய நண்பர்கள் உள்ளனரா என்று ஒரு நாள் முன்புதான் கேட்டேன்.மாலை என்னை அழையுங்களேன் என்று  சொன்னார் மாலையில் அவர் இரண்டு நண்பர்களின் கைப்பேசி எண்களைத் தந்து நீங்களே பேசிவிடுங்கள் என்றார்.

        23.03.2014 அன்று  மாலை நான் திரு.தேவதாஸ் அவர்களை தொடர்பு கொண்டபோது மகிழ்ச்சியுடன் என்னை நினைவு கூர்ந்து  எனது தளத்துக்கு வந்து அனைத்தையும் படிப்பேன் என்றும் மற்ற இணைய நண்பர்களைப் பற்றியும் விசாரித்தார்..அப்போது இன்று இரவு புறப்பட்டு நாளைக் காலை எர்ணாக்குளம் வருகிறேன், நான் பயணிக்க ஒரு வாடகை மகிழுந்து (கார்) வேண்டும் என்று வேண்டுகோள் விடுத்தேன் உடனே இன்னும் சிறிது நேரத்தில் தொடர்பு கொள்கிறேன் என்று சொன்னபடியே உங்களுக்கு வாடகைக் கார் பேசிவிட்டேன் என்றார்.மேலும் நானே நேரில் வருகிறேன் என்று மனமுவந்து சொன்னது எனக்கு மகிழ்ச்சியாய் இருந்தது.

        அடுத்த நாள்  சொன்னபடியே அதிகாலையில் அவரே தொடர்வண்டி நிலையம் (ரயில்)வந்திருந்து என்னை வரவேற்றது மிக்க மகிழ்ச்சியாய் இருந்தது. இணையம் நம்மை எப்படியெல்லாம் இணைக்கிறது என்று பெருமைபட்டுக் கொண்டேன்.பின்பு என்னுடனே பயணித்து நான் தங்குமிடம் வரை உடன் வந்து வழிகாட்டியது மகிழ்ச்சியாய் இருந்தது.மேலும் கொச்சினில் செல்ல வேண்டிய முக்கிய இடங்களைப் பற்றியும் சொன்னார்.





            நான் அவரைப்பற்றி விசாரித்தப்போது  அவர் கொச்சினில் அஞ்சனா நெய் (ANJANA GHEE) என்ற நிறுவனத்தை நடத்துவதாகவும்  அங்கேயே குடும்பத்துடன் தங்கிஇருப்பதாகவும்  கூறினார். தமிழ் உணர்வாளராகவும் பெரும்பாலான தளங்களுக்கு சென்று படிக்கும் வாசகராகவும் அதற்குமேல் நல்ல  பண்பாளராகவும் இருக்கும் நண்பர் திரு.தேவதாஸ் போன்ற நண்பர்கள்
இணையத்தில் மூலமாக கிடைத்ததில் நான் பெருமையடைகிறேன்.

         இணையத்தில் நாம் உலாவருவது மகிழ்ச்சியான நல்ல நிகழ்வுதான்  என்பதை எனது எனது குடும்பத்தாருக்கு சொன்னேன் அவர்களும் மகிழ்ந்தார்கள் உண்மையை உணர்ந்தார்கள்.

         நாளை இன்னொரு இணைய நண்பரைப் பற்றியும்  நெகிழ்வான சந்திப்புப் பற்றியும் சொல்கிறேன்.

(கவியாழி)